Below is a selection from the Cherokee Nation Constitution. 

ᎦᎫᏍᏛᏗ ᎠᏂᏣᎳᎩ ᎤᏂᎲᎢ

ᏗᎧᎸᎬᎢᏗᏢ ᎤᎾᏕᏅᎯ ᎠᎴ ᏭᏕᎵᎬᎢᏗᏢ ᎠᏁᎯ ᎠᏂᏣᎳᎩ, ᏔᎵᏁ ᏧᎾᏜᏍᏔᏅᎯ ᏥᎩ, ᎠᎴ ᏌᏉ ᎠᏰᎵ ᎤᏃᏢᏅᎯ ᏥᎩ, ᎯᎠ ᏥᏄᏍᏗ, ᏣᎳᎩ ᎠᏰᎵ ᎤᏙᏢᏒᎢ, ᎾᏍᎩ ᎢᏳᏍᏗ, ᎠᏴ, ᏣᎳᎩᏱ ᎣᎩᏣᏘ ᎠᏰᎵ ᏦᎩᎳᏫᏨᎯ ᎨᏒᎢ, ᎤᎬᏩᎵ ᏚᏳᎪᏛ ᎤᏍᏓ-ᏲᎯᏍᏗ ᎨᏒᎢ, ᎠᎴ ᏦᎨᏥ, ᎦᎸᏉᏗ ᎣᎦᏓᏤᎵ ᎨᏒᎢ, ᎬᏂᎨᏒ ᏃᏨᏁᎲ ᎣᏨᏗᏍᎬ ᎤᏓᏙᎵᏍᏗ ᎠᎴ ᎠᎵᎮᎵᏍᏗ ᎠᏓᏅᏓᏗᏍᏗ ᎨᏒᎢ, ᎤᏓᏅᏘᏳ ᎨᏒ ᎤᎬᏫᏳ ᏌᏕᎩ ᏂᎬᎾᏛᎢ, ᎾᏍᎩ ᎢᏲᎦᏛᏁᏗᏱ ᏦᎦᎵᏍᎪᎸᏓᏁᎭ, ᎠᎴ ᎣᏥᏔᏲᏎᎭ ᎣᎩᏍᏕᎸᏗᏱ ᎠᎴ ᎣᎩᏁᏗᏱ ᎾᏍᎩ ᎢᏲᎦᏛ-ᏁᏗᏱ, ᎾᏉ ᎾᏍᎩ ᎬᏂᎨᏒ ᏃᏨᏁᎭ ᎠᎴ ᎣᏥᏍᏓᏱᏗᎭ ᎯᎠ ᎾᏍᎩ ᎦᎫᏍᏛᏗ ᎾᏍᎩ ᏗᏁ-ᎸᏙᏗ ᎠᏂ ᏣᎳᎩᏱ.

ᏓᏓᎯᏢ I

ᎤᏓᏡᎬ 1. ᎠᏟᎶᏛ ᏕᎬᎫᏔᏂᏙᎸ ᎠᏂ ᏣᎳᎩᏱ ᎾᏍᎩᏉ ᎨᏎᏍᏗ ᏗᎪᎥᎯ ᏥᎩ ᎧᏃᎮᏛ ᏓᏠᎯᏍᏛ ᎹᏆᎢᎢ ᎤᏕᏘᏴᏌᏗᏒᎢ, ᏧᎾᏠᎯᏍᏔᏅᎯ ᎠᏂᏩᏥᏂ, ᎬᏩᏂᏁᏉᏍᏗᏍᎩᏂᏃᏅ ᎨᏎᏍᏗ ᎾᏍᎩ ᎢᏯᏛᏁᏗ ᏱᏂᎦᎵᏍᏗ ᎾᏉ ᎣᏍᏛ ᎾᏅᏁᎸ ᎠᏂᏣᎳᎩ ᎠᏂᏩᏥᏂᏃ ᎠᏍᏆᏛᎯ ᏂᎨᏒᎾ ᏥᎩ ᏗᎦᎸᏫᏍᏓᏁᏗ ᎨᏒᎢ.
ᎤᏓᏡᎬ 2. ᎦᏓ ᎠᏂᏣᎳᎩ ᎤᏂᎲᎢ ᏅᏩᏍᏕᏍᏗ ᎤᏂᏣᏘ ᎤᎾᏤᎵ ᎨᏎᏍᏗ, ᎪᎱᏍᏗᏍᎩᏂ ᏓᏛᏁᎸ ᎾᎿᏂ, ᎠᎴ ᏥᏚᏂᎭ ᏣᎳᎩᏱ ᎠᏁᎯ ᎠᏂᏏᏴᏫᎭ ᎾᏍᎩ ᏧᏃᏢᏅᎯ, ᎠᎴ ᏚᏳᎪᏛ ᎢᏯᏛ-ᏁᎸᎯ ᎾᎿ ᏱᏓᏂᏁᎸ, ᎠᏗᎾ ᎯᎠ ᏂᎤᏍᏕᏍᏗ ᎾᏍᎩ ᎠᏂ ᏣᎳᎩᏱ ᎠᏁᎯ, ᎤᎾᏤᎵᎦᏯ ᏥᎩ ᎠᎴ ᎦᎨᏥᎩᎡᏗ ᏂᎨᏒᎾ ᏥᎩ ᎪᎱᏍᏗ ᏓᏛᏁᎸ ᎾᏍᎩ ᎧᏁᎢᏍᏔᏅᎯ ᏥᎩ ᎠᏂ ᎯᎠ ᎠᏯᏙᎸᎢ, ᎥᏝ ᎠᎴ ᏰᎵ ᏗᎬᏩᏂᎾᏗᏅᏗ ᏱᎨᏎᏍᏗ ᎪᎱᏍᏗ ᏚᎾᏛᏁᎸᎢ, ᎠᏂᏩᏥᏂ ᎥᏝ ᎠᎴ ᏍᎦᏚᎩ ᏕᎨᏌᏗᏒ ᏩᏥᏂᏱ, ᎠᎴ ᎩᎶᏉ ᏩᏥᏂᏱ ᎡᎯ, ᎠᎴ ᎾᏍᏉ, ᎢᏳᏃ ᎢᎸᎯᏳ ᎠᏂ ᏣᎳᎩᏱ ᎡᎯ ᏳᏓᏅᏒ ᎤᎿᎥ ᏳᏰᏅ ᏳᏄᎪᏨ ᎠᏂ ᏣᎳᎩᏱ, ᎠᎴ ᎢᎸᎯᏢ ᎠᏰᎵ ᎤᏙᏢᏒ ᎾᎿ ᎡᎯ ᏱᏄᎵᏍᏔᏅ, ᏂᎦᎥ ᎤᏤᎵᎦᏯ ᎤᎲᎢ, ᎠᎴ ᏣᎳᎩᏱ ᎡᎯ ᎢᏳᏛᏁᎵᏓᏍᏗ ᎨᏒ ᎤᎲ ᎤᏲᎢᏎᎮᏍᏗ, ᎯᎠ ᎠᏗᎾ ᏄᏍᏕᏍᏗ ᎠᏓ-ᎴᏍᏗ, ᎾᏍᎩ ᎠᏰᎵ ᏗᏂᎳᏫᎩ ᎤᏂᎮᏍᏗ ᏗᎧᎿᏩᏛᏍᏗ ᎤᏃᏢᏗᏱ ᎬᏩᏂᎷᏥᏐᏗ ᎨᏒ ᎠᎴ ᏂᎦᎥ ᎤᎾᏤᎵ ᎢᏳᎵᏍᏘᏐᏗᏱ ᏣᎳᎩᏱ ᎠᏁᎯ ᎤᏂᎲᎢ, ᎾᏂᎥ ᎩᎶᎢ, ᎢᎸᎯᏳ ᏳᎾᏚᎵ ᏣᎳᎩᏱ ᎤᏂᎷ-ᏥᏐᏗᏱ, ᎾᏍᎩ ᎪᏪᎵ ᎬᏗ ᏱᏓᏂᏔᏲᏎᎭ ᎠᏰᎵ ᏗᏂᎳᏫᎩᏱ ᎥᎤᏂᎷᏥᏐᏗᏱ. ᎠᎴ ᎾᏍᎩ ᎠᏰᎵ ᏗᏂᎳᏫᎩ ᎤᏂᎮᏍᏗ ᏗᎧᎿᏩᏛᏍᏗ ᎤᏃᏢᏗᏱ ᎯᎠ ᎢᏳᏍᏗ ᎤᏚᎸᏗ ᎠᎴ ᏚᏳᎪᏗ, ᎠᏁᎵᏍᎨᏍᏗ ᎠᏅᏗᏍᎨᏍᏗ ᎠᏂᏏᎾᏌᏂᏳ ᎨᏒᎢ, ᎾᏍᎩ ᏧᏂᏲᏍᏙᏓᏁᏗᏱ ᏣᎳᎩᏱ ᎠᏁᎯ ᏧᎾᏤᎵᎵᏓᏍᏗᏱ ᏕᎦᎸᏫᏍᏓᏁᎸ ᎤᏂᏁᏉᏤᏗᏱᏉ ᎤᎬᏩᎵ.